الاثنين، 4 يونيو 2012

حوار مع صديق مقاطع الإنتخابات


أنا : انت هتقاطع ليه ؟

صديقى : عشان ماينفعش الانتخابات وقانون العزل لم يُفعّل



أنا : شاركت في الجولة الأولى ؟

صديقى : أيوه



أنا : طب شاركت ليه وقانون العزل لم يُفعل ؟

صديقى : عشان كنت فاكر ان شفيق ممكن مايعيدش ،، ولو هيعيد يبقى واحد من الثوريين هيبقى في الاعادة ، مش بتاع الاخوان



أنا : طب فرقت ايه ؟؟ ماهم كلهم مرشحين وطالعين من الميدان 

صديقى : لا أصل الاخوان باعوا الثورة والثوار وسابونا في محمد محمود ومانزلوش معانا



أنا : طب ما معظم القوى الثورية سابوا اخوانهم الثوار في العباسية ومانزلوش معاهم بالعكس قالوا عليهم نزلوا عشان مرشحهم مش في الانتخابات , ده غير ان احداث محمد محمود نفسها كان كل موقف القوى السياسية والأحزاب مخزى جداً وماحدش وقف مع الثوار غير بعض الحركات الشبابية فقط . 


صديقى : طب ليه الاخوان مايعملوش مجلس رئاسي مدني ؟؟ بصراحة لو ماعملوش كده يبقوا باعوا الثورة ودماء الشهداء ..


أنا : طب ليه أبو الفتوح وصباحي ماعملوش مجلس رئاسي في الجولة الأولى ؟!! وليه وافقوا عليه بعد ما طلعوا ؟!!! ومع ذلك ماقولتوش عليهم باعوا الثورة ودماء الشهداء 


صديقى : ماشي ياعم ... سيبك من اللي فات ليه مايعملوش مجلس رئاسي ؟؟ يضم (البرادعي + أبو الفتوح + صباحي + أبو إسماعيل ) ..


أنا : طب وليه نسيب كارت في ايدينا ونروح نلعب في كارت ممكن مانعرفش نتوافق عليه وننشغل بكلام غير قابل للتطبيق ،، مع ان العسكر بيلعبوا بكل الكروت ؟


صديقى : طب وفيها ايه ما الاخوان يتنازلوا شوية


أنا : طب ماهم اتنازلوا .. اتطلب انهم يعملوا نائب حمدين او ابو الفتوح والآخر يبقى رئيس الوزراء ووافقوا ،، اتطلب منهم صلاحيات محددة للاتنين ووافقوا ... اتطلب منهم ان لجنة الدستور مايبقاش جماعة الاخوان ليها الأكثرية وتبقى متنوعة ووافقوا ،، اتطلب منهم حاجات وتنازلات كتيرة جداً ووافقوا ... وكل مايعملوا تنازل يتطلب منهم تنازل آخر .. مع اني شايف ان ده ابتزاز سياسي واستغلال للأزمة .. 


صديقى : طب قول لي هينزلوا ازاي في الميدان لو مرشحهم خسر ؟!

أنا : انت مش واخد بالك أصلاً انهم في الميدان من دلوقتي  عشان يعملوا ضغط شعبي لعدم تزوير الانتخابات ؟ ... وأدينا بنلعب بكل الكروت .. ليه نخسر كارت مادام نقدر نلعب بيه ونكسب كمان .. كل أصوات المقاطعين لو اتحطت مع أصوات مرسي الثورة هتنجح .. على الأقل مش هنتقتل كلنا في الميدان وتتعلق رقابينا فيه .. اتقوا الله ودعوا خلافاتنا جانباً لتنتصر الثورة خلافك مهما كان مع الاخوان هو خلاف سياسى لكن الخلاف مع شفيق هو خلاف على دم ولو قاطعت تبقى بتنجح شفيق بمزاجك ..