الأحد، 29 يناير، 2012

ديمقراطية بالمصرى


يعني ايه ديمقراطية فى مصر ؟!


يعني 77% من الشعب المصرى يقولوا نعم للتعديلات الدستورية ... يبقي المشايخ ضحكوا عليهم و إستغلوا جهلهم و هما مش بيفهموا .


يعني الليبراليين و الإشتراكيين و معسكر القوى المدنية " العلمانيين " يطلبوا من المجلس العسكرى تأجيل الانتخابات عشان يستعدوا و يكونوا احزاب وبعدين يقولو ان الإسلاميين عاملين صفقة مع العسكر عشان يطول في الحكم .

يعني تختار ليبرالي أو إشتراكى تبقي فاهم سياسة .. تختار اسلامي تبقي جاهل و مش بتفهم .


يعني انا ليا وجهة نظر معينة واللي شايف غير كده يبقي مالوش فيها و لايفقه أى شئ في السياسة و مالوش حق الكلام .

يعنى نقول عايزين رئيس منتخب فوراً بعد انتخابات مجلس الشورى و نطالب باحترام الديمقراطية زى مابيقول الإعلان الدستورى برلمان ثم رئيس ثم دستور .. تقولوا لأ بلا اعلان بلا ديمقراطية عاوزين الدستور أولاً فى ظل حكم العسكر .

يعنى يقول الشعب كله ان ثورتنا بلا زعامات وبلا قيادات .. تقولوا لأ ليها زعيم و تفرضوا علينا حد تعملوه رمز للتغيير .


يعني 65% من الشعب المصرى يختاروا الاسلاميين .. يبقي شعب متخلف وجاهل ولا يستحق الحياة الكريمة .

يعني تسب وتشتم فيا و فى الآخر اقولك الله يسامحك .. تقولي وكمان بترد عليا ؟! :)

 الديمقراطية المصرى .. أم الاجنبى


ليست هناك تعليقات:

إرسال تعليق