الأحد، 25 ديسمبر، 2011

يعني ايه دولة إسلامية ؟!



- يعني ييجي التتار يقولوا لشيخ الإسلام ابن تيمية هنفرج عن المسلمين بس فيقلهم أهل ذمتنا قبل أهل ملتنا. 



- يعني تيجي امرأة مسيحية لصلاح الدين تقولوا إن زوجها أسير وإن هو اللي بيصرف عليها فيفرج عنه ويديهم فلوس توصلهم بلدهم. 


- يعني بعد تحرير القدس صلاح الدين وقواد الجيش يتبرعوا بالفلوس اللي يفدو بيها أسرى الجيش اللي كان بيحاربهم لأنهم فقراء. 


- يعني ييجي واحد قبطي يشتكي الوالي بتاعه لعمر ابن الخطاب فيحكم عمر إن القبطي يضرب الوالي ويقتص منه. 


- يعنى يختصم واحد من أهل الذمة مع أمير المؤمنين سيدنا علي على درع فيحتكموا للقضاء، ويحكم القاضى للذمي بالدرع لان حجته وبينته أقوى من أمير المؤمنين. 


- يعني يفتح الرسول صلى الله عليه وسلم مكة وييجي الناس اللي فضلوا يحاربوه ويؤذوه طول عمرهم فيقول لهم اذهبوا فأنتم الطلقاء. 


- يعني محمد الفاتح يبقى شاب في الـ 17 من عمره يحكم أقوى دولة في العالم ويفتح القسطنطينية وهو عنده 22 سنة. 


- يعني أسامة بن زيد يخرج على رأس جيش فيه كبار الصحابة وهو عنده 17 سنة بس. 


- يعني تستنجد امرأة واحدة بالخليفة المعتصم اللي يبعد عنها أكتر من 2000 كيلو متر فيبعتلها جيش جرار عشان يحفظ كرامتها وميقولش وهو إيه اللي وداها هناك عند الروم. 


- يعني التتار يهددوا العالم كله بالخراب والتدمير و جيش الدولة الإسلامية يكون هو الجيش الوحيد اللى يقف قدامهم و ينتصر عليهم وينقذ العالم منهم بجد مش زي ما بييجي في الأفلام الأمريكاني.


- يعني الخليفة هارون الرشيد يقول للسحابة أمطري حيث شئتي فسيأتيني خراجك. 


- يعني سيدنا علي قاضي المدينة أيام سيدنا عمر يقدم استقالته لأن الناس مفيش بينها وبين بعض مشاكل ومش محتاجين قاضي. 

- يعني يعدي واحد من بيت المال أيام الخليفة عمر بن عبد العزيز ينادي في الشوارع إذا حد محتاج فلوس ياكل أو يشرب أو يلبس أو حتى يتجوز ومحدش يرد عليه لإن الناس كل احتياجتها عندها . 



ليست هناك تعليقات:

إرسال تعليق